Моцна буря залапела Керестур и Кулу

Руски Керестур/Кула, 10.09.2019.

Вчера коло 13 годзин, Руски Керестур и околїско залапела моцна буря хтора ламала конари зоз витром и дижджом, алє векшей чкоди на щесце нє було.

У даєдних часцох валала води и струї нє було скоро цали дзень, а ситуация шє нормализовала аж коло 19 годзин вечар. Як виявели зоз Електровойводини Вербас, у Керестуре пре бурю настали велї озбильни гавариї котри ше у пополадньових годзинох ришовало, а шицки екипи Електровойводини були на терену.

Кед слово о паприґи, хтора тераз у штредку уваги, нєурядово мож дознац од даєдних паприґарох зоз валалу же було и дакус каменцу у часци хотара на Билей, алє векшей чкоди у паприґи, хтора и так досц поваляна, нє було. Буря и диждж дочасово застановели оберачку хтора, з оглядом же наявена вигодна хвиля, будзе нєодлуга предлужена.

Моцни витор з вельким дижджом залапел и Кулу, дзе було вельо одчакнути конари, а вода стала на велїх драгох и польох, так же шицки екипи ЯКП «Комуналац» були на терену. Стебла и конари зоз драгох склонєни у улїцох М. Тита, Йосипа Крамера, Мостарскей як и на углє ЮНА и Якова Иґнятовича.

Komentari

Ostavi komentar:

Preuzmite Q Media aplikaciju