Почали пририхтованя за виберанки Националних совитох

Сербия, 14.06.2018.

З подписованьом Спорозуменя о утвердзованю спецификациї вкупних планованих трошкох за потреби запровадзованя виберанкох членох националних совитох меншинох, котри буду отримани того року, практично почали пририхтованя за нїх.

Спорозуменє у Скупштини Сербиї подписали министер державней управи и локалней самоуправи Бранко Ружич и предсидатель Републичней виберанковей комисиї Владимир Димитриєвич.

Ружич гварел же виберанки буду розписани у авґусту, а отримани буду найпознєйше у новембру, як и же их запровадзи тот ресор зоз РИК-ом.

По подпусованю Спорозуменя, министер Ружич и народна посланїца Лїбушка Лакатош отримали схадзку з народнима посланїками и представителями националних совитох о новинох котри предложени у Законє о националних совитох националних меншинох, у одношеню на Окремни виберанкови список.

Ружич здогаднул же упис до того списку на добродзечней бази и же важне на час информовац гражданох о можлївосцох упису, як и же гевти котри уписани треба же би преверели свойо податки на час.

Понеже на дньовим шоре позарядовей схадзки Народней скупштини три закони з обласци меншинских политикох, министер гварел же ше з нїма значно унапредза условия за витворйованє правох националних меншинох, як и транспарентнєйшу и ефикаснєйшу роботу националних совитох.

РТВ

Komentari

Ostavi komentar:

Preuzmite Q Media aplikaciju