Кула, 18.11.2024. – Дзень општини Кула, 16. новембер, традицийно означени зоз шветочним коктелом у Шветочней сали општини на хторим присутни були заняти у Општинскей управи, як и директоре и представнїки явних институцийох и установох на териториї општини. Присутних привитали предсидатель Општини Кула Дамян Милянич и предсидатель Скупштини општини Кула Велибор Милоїчич. Додзельованє шветочних наградох општини Кула, хтори формално уж опредзелєни, того року преложене за децембер, пре пиєтет спрам жертвох траґедиї у Новим Садзе.
По словох предсидателя Општини, тот рок означели даскельо вельки инфраструктурни проєкти, та так отворена драга Сивец – Стапар, потим и драга Крущич – Керестур, а закончени и роботи на часци драги од уходу до Руского Керестура по виход спрам Лалитю. У идуцим року почню роботи на реконструкциї драги од Кули спрам Сивцу, предлужа ше роботи на старим будинку МУП-а у Кули, а у плану и велї менши проєкти.
Кед слово о рочних наградох – Школа за основне музичне образованє у Кули наградзена за квалитетну роботу и велї награди, Срдян Кружевич спред „Водох Войводини“ наградзени за шицко цо зробене прешлих рокох, Цвиєта Мучалица наградзена за доприношенє аматерскому театру на териториї Општини, Слободан Раячич за пошвеценосц роботи у Фодбалским клубу „Липар“, а Саша Пристайко за борбу у войни на Кошарох, прецо є и одликовани.
Извор: Qmedia
