Кула, 20.12.2024. – Перша точка дньового шору 19. Схадзки Скупштини општини Кула, хтора отримана 18. децембра, була Предлог за розришенє заменїка предсидателя локалного парламенту Михайла Пашу. Тоту инициятиву придали 13-еро одборнїки опозициї, а у своїм обгрунтованю визначели же заменїк предсидаля Скупштини општини Кула отїлотворенє систематичного насилства та же му очуванє привилеґийох було понад интересох гражданох и еґзистенциялних питаньох. З другого боку, одборнїки владаюцей векшини визначели же Пашо, на основи своїх резултатох, ма вельке довириє як гражданох Руского Керестура так и цалей Општини Кула. По заключеню розправи прешло ше на тайне гласанє та констатоване же за змену гласали дзевецеро одборнїки, зоз чим тота точка дньового шора нє достала потребну векшину.
Кед слово о другей точки, Предлог Одлуки о буджету општини Кула за 2025. рок, опозицийни одборнїки гварели же нєт ясни деталї о отриманей явней розправи та же буду глєдац оценьованє уставносци од одвичательних институцийох. Предсидатель општини Кула Дамян Милянич визначел же ключни приходи звекшани и же реализация вельких инвестицийох будзе главни приоритет. Под час бешеди предсидателя општини, одборнїки опозициї поставали опрез стола предшедаюцого, после чого вирекнути даскельо опомнуца. Буджет на концу прилапени зоз векшину гласох присутних одборнїкох.
На схадзки тиж прилапени Предлог ришеня о даваню согласносци на одлуку Управного одбора Дома култури Руски Керестур о розписованю и запровадзованю явного конкурса за менованє директора Дома култури Руски Керестур, прилапене задзекованє директора Явного комуналного подприємства «Руском», а на место потерашнього члена Општинскей ради општини Кула Владимира Олеяра зоз тайним гласаньом вибрана Ґабриєла Саянкович.
Извор: Qmedia
