Сербия, 24.01.2025. – Приявйованє пензионерох за безплатну регабилитацию у баньох у Сербиї на трошок Републичного фонда за пензийне и инвалидске осиґуранє тирва заключно зоз 27. януаром.
Пензионере прияву треба же би придали у здруженьох пензионерох спрам адреси пребуваня, дзе можу превжац и попольнїц формулари и подписац вияви у хторей банї жадаю вихасновац регабилитацию и же нє маю други приманя.
Tреба придац чек пензиї, доказ о висини иножемней пензиї и медицинску документацию зоз хтору розполагаю, а хтора ше нє бодує, лєм служи як репер же би ше пензионера нє послало до банї хтора ма контраиндикациї у одношеню на його здравствени стан.
Критериюми за бодованє: висина пензиї, роки роботного стажу, кельо роки ше хаснує пензия, а хаснователє права на старанє и помоц другей особи и дзеци фамелийни пензионере маю додатни боди.
Прелиминарни ранґ-лїстини буду обявени 5. марца 2025. року на огласних таблох у здруженьох пензионерох и у филиялох Фонда ПИО. Термин за пригварки тирва пейц роботни днї, односно по 12. марец.
Извор: ПИО Фонд
