Kула, 22.05.2025. – Схадзка Скупштини општини Кула, 21. по шоре, хтора отримана 20. мая, почала зоз Предлогом за розришенє предсидателя локалного парламента Велибора Милоїчича. Як причину за тоту инициятиву одборнїки опозициї наведли константне потупйованє Дїловнїка и подзвигованє тензийох, як и дискриминация одборнїкох, прецо пришло до потупйованя демократичного диялоґа. Тиж так, одборнїки опозициї як єдну зоз причинох наведли и присуство Милоїчича у Пионирским парку у Беоґрадзе. З другого боку, одборнїки владаюцей векшини визначели же опозициї нє битне хто шедзи на месце предшедаюцого, алє же вина по їх видзеню универзална кед у питаню одборнїки векшини. Кед слово о пребуваню у Пионирским парку, одборнїки власци визначели же то бул нєроботни дзень, та же Милоїчич мал леґитимне гражданске право буц дзе сце и виражиц свойо политичне становиско. После дискусиї отримане тайне гласанє та утвердзене же за змену гласали дзевецеро одборнїки, зоз чим Предлог за розришенє нє достал потребну векшину.
По другей точки, тиж бул Предлог за розришенє, алє тераз предсидателя општини Дамяна Милянича. По тей точки, одборнїки опозициї, хтори и предложели точку, визначели же єдна зоз причинох то же предсидатель општини дзелї гражданох на тих зоз перших и других шорох, та же главни мотив того подзелєня припадносц владаюцей странки. Друга причина, як наведзене, то урбанистични хаос и самопромоция за хтори предсидатель општини директно одвичательни. По тей точки, одборнїки владаюцей векшини гварели же спомнути предлог уж видзени сценарио и же у нїм нєт анї єден факт, та же у каждим моменту, а нє лєм по питаню тих предлогох, даю потримовку предсидательови Миляничови. По тайним гласаню утвердзене же Предлог потримали осмеро одборнїки, зоз чим нє достата потребне векшина.
Кед слово о других точкох дньового шора, на схадзки прилапени Предлог Одлуки о приношеню Плана детальней реґулациї за реализацию аґросоларного проєкту „Аґросолар Кула“ на териториї општини Кула, Предлог Одлуки о оцудзеню будовательней жеми зоз явней власносци општини Кула, Предлог одлуки о прилапйованю звита о роботи установох чий снователь општина Кула за 2024. рок: Културни центер Кула, Дом култури Червинка, Дом култури Сивец, Дом култури Руски Керестур и Народна библиотека Кула, Предлог Одлуки о прилапйованю рочного ликвидацийного звиту Явного подприємства „Завод за вибудов“ Кула – у ликвидациї и Предлог Одлуки о прилапйованю финансийного звиту истого подприємства зоз станом на дзень 31.12.2024. рок, Предлог Програми потримовки за запровадзованє польопривредней политики и политики руралного розвою општини Кула за 2025. рок, Предлоги Ришеня о розришеню и менованю членох роботних целох (комисийох) Скупштини општини Кула и розришеню и менованю членох Школского одбору и на концу Одборнїцки питаня.
Извор: Qmedia
