Кула, 17.06.2025. – Отворени 66. Републични фестивал аматерских театрох Сербиї. Того року фестивалску заставу, хтора под час фестивалу виложена опрез Културного центру, подзвигнул ґлумец Дома култури Червинка Милорад Бєлан, а фестивалски огень запалєла ґлумица Културного центру Кула Слободанка Кнежевич. По краткей програми опрез Културного центру, публика завжала свойо места у сали.
Редактор програми и ґлумец Културного центру Кула Слободан Ноґавица и координаторка за културу Општини Кула Цвиєта Йованович Мучалица привитали публику, представели програму и награди хтори обчекую найуспишнєйших ґлумцох и ансамбли, представели жири. Фестивал урядово потим отворел ґлумец Сербского народного театру и професор на Академиї уметносцох у Новим Садзе Предраґ Момчилович Моци.
Перши вечар на Фестивалу ше представели ґлумци Драмскей секциї „Велимир Сандич Велько“ Дома култури Сивец хтори виведли представу „Бесни Теофило“ по мотивох приповедки Бранислава Нушича, а у режиї Милоше Милошевича. Награду за найлєпшого ґлумца вечара достал Душан Есапович за улогу Теофила.
Други вечар на Фестивалу одбавена представа „Любовне писмо“ по тексту Златана Фазлаґича и Зорана Бачича, у режиї Душка Ашковича, хтору виведли ґлумци Театру „Раша Плаович“ зоз Убу. Награду за найлєпшого ґлумца достала Миряна Симич за улогу Яґоди Кралєвич.
Треца вечар ґлумци Театру „Стеван Сремац“ Дома култури Червинка одбавели представу „Полонеза Оґинского“, по тексту Николая Коляди, у режиї Милени Павлович, а награду за найлєпшого ґлумца вечара достала Ґордана Мештер за улогу Людмили.
Извор: Qmedia
