КУЛА, 21.07.2025. – Предсидателька Покраїнскей влади Мая Ґойкович, пияток
18. юлия, пребувала у роботней нащиви општини Кула. Тиж так,
Општину нащивели и покраїнска секретарка за културу, явне
информованє и одношеня з вирскима заєднїцами Александра
Чирич Бошкович, совитнїк предсидательки Покраїнскей влади
Раде Войнович, а привитали их предсидатель општини Кула
Дамян Милянич, предсидатель Скупштини општини Кула
Велибор Милоїчич, помоцнїца предсидателя општини Єлена
Павков и руководитель Оддзелєня за инвестициї Блажо Костич.
Предсидателька Ґойкович перше нащивела будуци будинок
музею и библиотеки у Ленїновей улїци, а потим отримана
роботна схадзка. Предсидателька Покраїнскей влади гварела же є
задовольна зоз тим цо видзела, же роботи чечу по плану и же сам
будинок импресивни. Тиж так, вона визначела и же було слова и
о пририхтованю буджета за идуци рок та як найзначнєйшу
будуцу инвестицию визначела будинок оводи у Руским
Керестуре.
“З вельким задовольством сом ше одволала поволанки
предсидателя и руководства тей општини же бим пришла и же
бизме вєдно обишли будинок хтори, наздаваме ше, будзе
закончени идуцого року. Будинок наисце импресивни и на 1800
квадрати ма места за штири установи култури. Кед започати
роботи видзело ше же у яким подлим стану бул тот обєкт та ше
мушела поробиц вименка, односно допольнєнє проєкта по
хторим роботи започати. Перши средства виплацени ище 2023. и
2024. року, знаце же зме мали даяки ревизиї хтори вимагали
людзе зоз Кули, медзитим тераз шицко у порядку. Иснує потреба
и пошвидко будзе закончене допольнєнє проєкта праве пре
нєдостатки хтори замерковани и подли стан будинку, з цильом же
би вон бул закончени найпознєйше по початок идуцого року же
би конєчно и музей и библиотека, як и Спомин хижа Исидора
Баїча достали место яке заслужую”, гварела Мая Ґойкович.
Предсидатель општини Кула Дамян Милянич подзековал
предсидательки Покраїнскей влади на нащиви и визначел
значносц сотруднїцтва хторе локална самоуправа ма зоз
покраїнску власцу, а пре хтору ше реализую значни проєкти за
општину Кула.
“Мал сом задовольство же бим спред општини Кула и
особнє привитал предсидательку Покраїнскей влади, як и
покраїнску секретарку за културу и єй сотруднїкох. То барз
значна нащива за нашу Општину, насампредз пре музей и
библиотеку алє и пре велї други проєкти хтори ше реализую у
нашей Општини. Особна потримовка предсидательки нам вельо
значи и то драга по ришованє и розробок проблемох наших
гражданох и реализация капиталних проєктох за нашу Општину”,
гварел предсидатель општини Кула Дамян Милянич.
Извор: Q media
