СРБИЈА, 15.01.2026. – История Руснацох памета датум 17. януар 1751. року бо теди Фанц Йожеф де Редл, совитнїк царици Мариї Терезиї и администратор Кральовско-державного Бачкого дистрикту у Зомборе подписал Декрет о насельованю 200 руских грекокатолїцких фамелийох на тедишню пустару Вельки Керестур. Бул то початок присельованя а тераз ше того дня означує Национални дзень Руснцох у
Сербиї.
З пригоднима програмами Националне швето будзе означене по подручних канцеларийох Националного совиту Руснацох, а централна шветочносц означованя Националного швета Руснацох у Републики Сербиї того року будзе отримана у Новим Орахове на соботу, 17. януара. Шветочносц почнє зоз Архиєрейну Службу Божу у Церкви Христа Спасителя на 17 годзин. У Доме култури на 18:30 буду поставени етно-столи Активу женох КУД Жатва з Коцура, на 19:15 почнє промоция кнїжки Вично тирва 13. май о прешлосци рускей заєднїци у Новим Орахове, а од 20 годзин почнє Шветочна академия.
По информацийох яки сцигли зоз служби Националного совиту, на штварток 15. януара Дзень Руснацох будзе означени у Новим Садзе на 20 годзин у Руским културним центру. На пияток, 16. януара швето будзе означене у Шидзе на 18 годзин и у Доме култури Руски Керестур на 19:30 годзин.
На соботу, 17. януара локална преслава Националного швета Руснацох будзе у Дюрдьове на 12 годзин, у Господїнцох на 13:30 г и у Бикичу на 17 годзин.
На нєдзелю, 18. януара пригодна програма будзе у Бачинцох на 17 годзин и у Кули на 18 годзин.
Штварток, 22. януара швето будзе означене у Суботици на 18 г и у Коцуре на 19 годзин. На соботу, 24. януара зоз пригодну програму швето означа Вербащанє.
Централна програма будзе отримана на соботу, 17. януара у Новим Орахове.
Извор: Q media
