КУЛА, 19.01.2026. – Локална преслава Националного швета Руснацох у Републики Сербиї вчера,18.01.2026. року отримана у Кули у просторийох Руского културно уметнїцкого дружтва „Др Гавриїл Костельник“.
Даєдни швета ше нє означую лєм на календаре алє и зоз язиком, писню и здогадованьом. Внєдзелю таки дзень за Руснацох бул у Кули, дзе зоз пригодну програму у орґанизациї Руского културно уметнїцкого дружтва пред госцами з Националного совита Руснацох, општини и актерох зоз културного и политичного живота, преславене швето Руснацох.
По привитних словох Предсидателя националного совиту руснацох, Стевана Самочету у хторих похвалєл роботу дружтва, висши референт за културни дружтва у општини Кула, Цвиєта Мучалица гварела же треба потримовац шицки дружтва хтори робя, без огляду на число кед єст резултати.
Еуфемия Планкошова печитала звит о Руснацох, а потим ше представела жридлова шпивацка ґрупа под єй руководством зоз колядами. Програму потим прикрашели наймладши, Николина Орос и Димитриє Колошняї зоз рецитацию, а стихи писнї “Руски дзивки дакеди” пречитала Ивона Йоксович. Йован Бошкович на гармоники одграл композицию Йована Ивановича “На габох Дунаю” а потим Златка Чизмар пречитала поему “Бешедо моя” Дюру Папгаргая.
Предсидатель РКУД “Др Гавриїл Костельник”, окрем привиту на початку, одецитовал и пригодну писню Гавриїла Костельника . Потим ше на бину випендрала дзецинска шпивацка ґрупа зоз писню “Зламала ше кормань деска” у провадзеню Еуфемиї Планкош на гармоники, а по рочним звиту приказаним на видео биму, здогадли зме ше побиднїцкей писнї фестивала “Най ше нє забудзе” хтору одшпивала женска шпивацка ґрупа РКУД “Др Гавриїл Костельник”.
По програми друженє предлужене на истим месце зоз шпиванку, танцом на коктелу хтори пририхтали члени дружтва.
Извор: Q media
