РУСКИ КЕРЕСТУР, 03.03.2026. – У просторийох Месней заєднїци у Руским Керестуре, всоботу, 28. фебруара була отримана порядна Рочна скупштина Рускей матки. Поднєшени звити за прешли и плани за идуци рок, а принєшени и даскельо одлуки коло вименки Статуту.
За записнїчара вибрана Татяна Горняк, котру познєйше на схадзки єдногласно вибрали и за нового секретара РМ.
По звиту кнїжководительней аґенциї, приходи РМ у прешлим року по конкурсох зоз вецей уровньох були милион 327 тисячи динари.
Звит о своєй роботи поднєсол предсидатель РМ проф. др Михайло Фейса, а понеже є його, вон представел и роботу одбору РМ зоз Коцура. Роботу Одбору РМ зоз Керестура представел Дюра Папуґа, зоз Нового Орахова Дарко Заґорац и Срдян Ґовля, а зоз Вербасу Деян Загорянски. Оправдано на схадзку, пре скорей заказани бвязки, нє пришли представнїки одборох зоз Нового Саду и зоз Кули, алє шицки доставели писани звити о своєй роботи. Нє були анї представнїки месного одбору зоз Дюрдьова, алє вони анї нє мали обовязку подношиц звит, бо то новоформовани одбор.
И до самого Статуту буду унєшени пременки. На схадзки прилапене же би ше порушало пременку шедзиска адреси на Бориса Кидрича 60, зоз дакедишнєй М. Тита 56 и же би ше схадзки Скупштини, у случаю нєдостатку кворума могли отримовац и зоз 10 одсто присутних членох после 30 минути чеканя.
У Статуту ше пременї и же УО може мац менєй як 11 члени, а члени УО годни буц зоз каждого з месних одборох, и кажди член треба же би мал свойого заменїка. Пременї ше и тото же предсидателє шицких одбору можу буц и ревибрани, после мандату од 4 роки.
Цилї РМ, окрем потерашнїх буду мац и: закладанє за Руску националну статеґию 2026–2031., Национална ґалерия и Национални музей, интеркултуралносц, и диґитализация руского язика у шицких сферох.
У составе редакцийного одбору гласнїка „Руснак” ґу потерашнїм членом, а то Михайло Фейса, Дюра Папуґа, Славица Чельовски, Владо Няради, Михайло Катона, Владимир Гаргаї, пришол и Мирон Джуня, а надпатраюци остал исти, у составе: Владимир Гаргаї, Любица Няради и Стеван Самочета.
На концу схадзки догварене же члени РМ активно буду робиц на оформйованю месних одборох у Суботици и у Беоґрадзе.
Извор: Q media
