РУСКИ КЕРЕСТУР, 20.03.2026. – Соботу 14. марца, пред числену публику у Велькей сали Дома култури у Руским Керестуре виведзена премиєра музично-поетскей представи „Кантата за Ленку и Лазу“ у режиї Славка Ороса, а у виводзеню ґлумцох аматерох Руского народного театра Петро Ризнич Дядя.
Вечер бул полни зоз емоциями, музику и поезию тана
публику охабел окремни упечаток хтори ше длуго памета.
Представа, инспирована зоз траґедийну любовну приповедку медзи Ленку
Дундєрски и єдним зоз найзначнєйших сербских поетох – Лазом Костичом,
принєсла музично-поетску инсценацию єдного зоз найпознатших и найсмутнєйших
любовних мотивох у сербскей културней историї. Преплєтанє стихох, драмского
текста и музичних мотивох створело цалосц, хтора дотхлла публику и отворела
простор за глїбше роздумованє о любви, жертви и судьби.
Окремну повагу прицагли розкошни костими и осторожно обдумана сценоґрафия,
хтори публики дочаровли дух епохи и амбиєнт часу у хторим ше одвивала тота
позната любовна приповедка. Шветлосни ефекти и музична секция додатно
поцильовали атмосферу, даваюци шицкому виводзеню окремну уметнїцку
валоризацию.
Ґлумецки ансамбл указал високи ступень анґажованосци и пошвеценосци, а
интерпретациї особох були виполнєни зоз щирима емоциями и сценским
увереньом. Окреме ше видзвигли главни протаґонисти, Адриана Надь Барна и
Мирослав Малацко, хтори на сцени дочаровали суптилну, алє и моцну емотивну
вязу медзи Ленку и Лазом, хтора осциловала медзи надїю и безнадїйносцу.
Пре вельке число нащивительох, велї представу провадзели на стояцо, а на концу
публика виводзенє наградзела зоз моцнима овациями, потвердзуюци же премиєра
тей представи охабела моцни упечаток на шицких присутних.
У писаню текста хасновани виривки зоз кнїжки „Дньовнїк Ленки Дундєрски“ и
„Дньовнїк снох Лази Костича“, хтори додатно розяшнєли зложеносц емотивней
вязи двох протаґонистох и приближели публики швет їх думкох и чувствох. Тота
комбинация документарного и уметнїцкого виражованя допринєсла ґу тому же би
автентичносц и глїбини цалого проєкту була така як права.
Тота премиєра нє лєм же потвердзела значенє аматерского театру у очуваню
културней традициї, алє и указала на потребу дальшого розвою и потримовки
таким уметнїцким инициативом, хтори зближую людзох и оживюю богату културну
историю нашого простору.
Репризу инсценациї годно одпатриц на Драмским мемориялу „Петра Ризнича
Дядї” хтори будзе отримани од 17. по 26. април у Руским Керестуре, а окрем нєй
представя ше и: Драмски студио „Звонимир Павлович” Руского културного центру
Нови Сад зоз „Чарноим лебедом”, по мотивох драмского тексту Звонимира
Павловича, а у адаптациї и режиї Славка Виная. Ґлумци Театру „Стеван Сремац”
Дома култури у Червинки, медзи хторима и керестурски аматере, виведу
представу „Илузиї” по тексту Тония Кушнера, режисерки Милени Павлович, а на
Мемориялу будзе госцовац и Културни центер Кула зоз представу Джона Патрика
Шенлия „Сумня”, хтору режира Слободан Станкович.
Театри зоз Кули и Червинки на Мемориялу буду мац и дзецински представи на
сербским язику, а наймладши патраче годни одпатриц и нову дзецинску представу
по руски Драмского студия „Арт” Дома култури Руски Керестур по мотивох Карла
Колодия „Авантура єдного робота”, у режиї Ребеки Планчак и Мирослава
Малацка, хтори и прилагодзели текст вєдно зоз дзецинским ансамблом. Тиж так,
школяре и оводарци на Мемориялу буду патриц и новосадску бабкарско-дзецинску
представу „Мило ми, я Руснак/Рускиня” Драмского студия „Звонимир Павлович”
РКЦ, хтору пририхтали Ана-Мария Рац и Оля Яковлєв.
У рамикох Мемориялу будзе отримани и Вечар ювилантох, хтори того року будзе
пошвецени Дюрови Папгаргайови и Ани Дудашовей з нагоди 90 рокох од їх
народзеня, а на тим вечаре здогаднє ше и на Владимира Бесерминя, хтори би того
року наполнєл 80 роки. Модераторка того вечара будзе Ясмина Дюранїн.
Тогорочни, 58. Драмски мемориял „Петра Ризнича Дядї” почнє зоз отвераньом
вистави маскох и бабкох зоз новосадского Театру младих, а у плану же би у
рамикох Мемориялу була отримана и промоция зборнїка Дюру Латяка – „Руски
народни театер ‘Петро Ризнич Дядя’ – 50 роки”.
Извор: Q media
